2009年7月26日,東涌仿真草地足球場。

今場波陣容相當唔協調,多數人腳都係前鋒......而且係未夾過,位置錯晒!

踢左大半時間我地輸既0:4,前鋒冇氣做後衛我終於有機會上前助攻!

賽果2:4輸,我攻入一球。

2009年7月24日,鰂魚涌人造草足球場。

聯賽終於開始,今場波係響鰂魚涌人造草場踢,依個場兩年前已經好爛,點知到左兩年後既今日仲更加爛......真係!咁既場都可以收錢。

我首次穿上CascadeFC球衣上陣,號碼係7號(本身我想要17號,但係有人著左),位置踢中場!

今場波首次同隊友夾,雖然需要一段時間適應,但係本身響東涌同姨丈夾開,所以有幾球波都有威脅,只係差少少就製造到入球。

賽果3:0嬴。

第一場嬴波,真係一個好開始!

2009年7月19日,修頓石地足球場。

今場波本身以為冇得踢,因為之前打風......。

中午同屋企人睇樓行左大半日,身體極之疲累......。

去到球場竟然又「地樁」......。

今場波我方陣容可算冇前鋒,開波冇耐就慘被攻入兩球......。

今場波雖然狀態唔算好,不過射出兩球「招牌貨」~遠程笠射!第一球柱邊出界,第二球應聲入網,入左魔聯三年多都係首次用「招牌貨」射入,以前響夢幻隊時代,好多時都靠依招「破蛋」......因為當時夢幻隊冇前鋒(多數係唔識踢波既球員踢前鋒),所以我曾經苦練射術,當帶波到中場時就往往得手!而魔聯前鋒線強,所以冇咩機會射!

賽果2:5輸,我攻入一球。

2009年7月16日,摩頓台石地足球場。

今次我方多位正選球員冇出席,而多左兩名外援球員!

今場波後防球員比較多而前鋒﹑中場球員少,響咁既陣容下我地比平時更加吃力......不過響我地努力之下亦能戰勝對手!

賽果5:4嬴。

2009年7月9日,旺角花墟石地足球場。

今場波正式為聯賽作練習。

場波勢均力敵,我方機會佔優可惜運氣唔夠。

賽果2:3負。

2009年7月5日,修頓石地足球場。

今場波我地只得6個人......好彩對方肯借人幫我地守龍門!

天氣就一直落雨,地面濕滑令雙方球員都發揮不好。

星期四將軍澳一戰後疲倦未消,依場波仲要打足全場冇人換......雖然未至於氣力不繼,但到後半段發揮不如理想......。

賽果3:3和。

近兩﹑三場波踢完之後一﹑兩日關節位都比較疲倦,要想辦法令狀態回升。

2009年7月2日,將軍澳人造草地足球場。

今場賽事對方人數比較少,我方人數佔優。

第一次休息,第二節打前鋒,第三節打中場。

賽果4:2嬴,我攻入1球。

姨丈今日問我跟唔跟他一齊踢公司聯賽,我一口答應!雖然本身已經對比賽冇任何期望,不過以現在過左高峰期之後都想睇下自己仲可以踢到咩程度。